Að kvöldi 1. apríl

Yfirleitt breyti ég ekki færslum en af því að 1. apríl er að kvöldi kominn fær þessi nýja fyrirsögn og verður sett í sviga. Ég sé að margir litu á þessa frétt og fóru alla leið að síðustu krækjunni, sem sagði allt sem segja þarf. Það sem er hérna fyrir neðan tilheyrir sem sagt allt 1. apríl.

--- 

Hannes H. Gissurarson skipaður sendiherra í New York

Sú ákvörðun að skipa Hannes Hólmstein Gissurarson sendiherra hjá Sameinuðu Þjóðunum og Alþjóðabankanum í New York hlýtur að vekja ólgu í samfélaginu.

Nú hafa þegar borist harðorðar yfirlýsingar frá ungum vinstri grænum og Samtökum um bætta stjórnsýslu.

Í tilkynningu utanríkisráðuneytis kemur fram að Hannes sé skipaður eftir reglum um sendiherra sem ekki hafa fengið framgang í utanríkisþjónustunni heldur komi annars staðar frá. Hann hafi mikla reynslu á sviði alþjóðamála. Seta hans í bankaráði Seðlabankans komi honum til góða við samskipti við Alþjóðabankann og Alþjóða gjaldeyrissjóðinn.

Það er talið mikilvægt við núverandi aðstæður að til þessara starfa veljist ötull talsmaður Íslands á alþjóða vettvangi sem njóti trausts hjá alþjóða bankastofnunum.

Háskóli Íslands birti tilkynningu í morgun þar sem sagt er að prófessorinn verði kvaddur með mikilli eftirsjá. Á heimasíðu Hannesar mátti í morgun lesa kveðjuorð samstarfsmanna úr mörgum deildum Háskólans. Eins og kom fram í yfirlýsingu rektors HÍ í morgun þýðir þessi skipun að mál Háskólans varðandi dóm yfir Hannesi vegna ritstuldar verður fellt niður og ekki aðhafst frekar í því máli.

Hvað á stjórnin að gera?

Þrýstingurinn eykst á stjórnina að gera eitthvað í efnahagsmálunum. Til þess að vita hvað á að gera, þarf að vita hvað er um að vera.

Með fullri virðingu fyrir hagspekingum þá eru flestir þeirra að reyna að ráða í stöðuna sem breytist á hverjum degi. Meðan fólk veit ekki hvað mun gerast er ekki gott að fara að gera eitthvað, bara til að það sjáist að sé verið að gera eitthvað.

Um leið má sjá að það eru nokkrir hópar sem fara illa út úr láns- og lausafjárskorti. Þegar Gylfi Arnbjörsson bendir á að forsendur nokkurra vikna gamalla kjarasamninga séu brostnar, þá dugir ekki að bíða og sjá hvort allt falli ekki í ljúfa löð síðar á árinu. Til þess að það gerðist þyrfti að verða verðhjöðnun. Það er ekki neitt sem bendir til þess núna. Þvert á móti bendir allt til að verðbólga aukist hér á landi um leið og hún mun aukast í viðskiptalöndunum. Þess vegna verður að hefja aðgerðir til að bæta fyrir brostna samninga strax.

Aðrar aðgerðir í efnahagsmálum verða að bíða þess að fólk viti hvert stefnir. Það steðjar ekki hætta að samfélaginu. Vöruverð hækkar en aðalútflutningsvörur okkar, fiskur og ál, hækka meira en flestar aðrar vörur. (Við fáum tekjur af álinu fyrst og fremst í rafmagnsverði). Verðbólgan þýðir að þjónustan sem við höfum haft mestar tekjur af, fjármálaþjónustan, verður minna virði. Hinar stærstu þjónustugreinarnar, forritun og ferðaþjónusta, styrkja stöðu sína.

Það eru aumingja skuldararnir sem munu hafa það verst eins og alltaf. 

Talar forseti hér?

Er hægt að sjá á einni ræðu að þar tali verðandi forseti? Hér talar Obama um kynþáttavandamál, sem hann telur að hafi fylgt Bandaríkjamönnum frá upphafi og ekki sé lengur hægt að sópa þeim undir borðið.

Það sést í byrjun að þar talar kennari í stjórnskipunarrétti. Eftir því sem líður á ræðuna færir hann sig yfir í vandamál dagsins. Hann fer úr stóru dráttunum yfir í þá smáu og endar á lítilli frásögn til að færa hlustendur nær sér.

Gætið að því að ræðan, A more perfect union er rúmur hálftími.

Obama ræðir um kynþætti og önnur vandamál Bandaríkjamanna. 

Kreppan þýðir breytingar

Með fullri virðingu fyrir raunum íslenskra félaga á markaði, þá snerta örlög þeirra lítið heimilisbókhaldið hér. Peningar í eigu Pálma, Jóns Ásgeirs eða Bakkavararbræðra breyta litlu um hvernig efnahagurinn er á þessu heimili.

Það eru stærri breytingar sem skipta máli í því sambandi. Krónan lækkar og sjávarútvegurinn hættir taprekstri. Fiskeldi verður arðbærara þannig að það eykst á ný. Sókn í loðnu, kolmunna og makríl til að fóðra þessa fiska verður meiri, svo furðuleg viststefna sem það nú er.

Í Bandaríkjunum og Evrópu hafa orðið stórtíðindi, falin á bak við tíðindi af einstökum félögum, rétt eins og hér. Fólk kennir ennþá lausafjárkreppuna við undirmálslán, þó að það sé löngu orðið ljóst að herkostnaðurinn í Írak og Afganistan eigi þar miklu stærri þátt.

Þá gerist það sama og á áttunda áratugnum, þegar skattar voru lækkaðir um leið og herkostnaðurinn í Víetnam gleypti æ stærri hluta af kökunni, en var af sömu pólitísku ástæðunum falinn fyrir fólki.

Lágt gengi á dollar gat ekki til langs tíma haldið burtu ódýrari innfluttum vörum. Bandaríkjamenn fara að framleiða aftur fyrir nýríka markaði í Asíu og Evrópu, þó að heimamarkaðurinn sé sem fyrr sá langmikilvægasti í heiminum.

Hátt gengi evru þýðir að verð á innfluttum vörum frá Bandaríkjunum lækkar í Evrópu og ferðamenn flykkjast þaðan til Bandaríkjanna.

Á áttunda áratugnum komu afleiðingarnar fram á líkan hátt. Verðbóga jókst um leið og atvinnuleysi. Þetta var kallað stagflation, stöðnun með verðbólgu.

Lausafjárkreppunni hefur núna verið mætt með því að bankar losa nýtt fjármagn. Á íslensku þýðir það að peningar eru prentaðir. Það hefur þýtt verðbólgu hingað til.

Gott að vera lögfræðingur

Ef niðursveiflan í heiminum ætlar að reynast verða jafn djúp og hún lítur út fyrir núna, þá verður gott að vera lögfræðingur.

Þegar maður lendir í vanda hefur maður samband við lögfræðing og það eru margir í vanda núna.

Svo segja fréttir og hvísl að núna eftir páska komist skriður á sameiningu fjármálastofnana.

Önnur félög verða tekin út af markaði, þar sem markaðsvirði þeirra er komið niður fyrir skráðar eignir.

Nóg að gera fyrir lögfræðingana. 

Ég trúi því ekki!

Það hlýtur að vera það sem þau segja þegar Óli Gneisti kallar A7:

 

Ég trrrrrúúúúúúi því ekki, ég er með bingó!

 

Lifið heil. 

Vantrúaðir spila bingó

Kári og Morten ræða hjólamenningu

Í þættinum Dr. RÚV í dag var rætt við Kára Harðarson og Morten Lange um hjólamenningu. Kári er einn af bloggvinunum eins og sjá má hér til hægri.

Það er hægt að hlusta á þáttinn til annars í páskum.

Hærri skattur á suma áfenga drykki, ný hugmynd frá flokki Thatchers

Toríar (Íhaldsflokkurinn) í Bretlandi vilja leggja skatt á sterkan cider, mjög sterkan bjór og alkógosdrykki (alco-pops).

Þetta virðist eiga að verða mjög hnitmiðaður skattur sem komi ekki niður á víndrykkjufólki, þeim sem drekka venjulegan bjór eða óblandað vískí. Það gæti nefnilega höggvið skörð í kjósendaraðir Toría.

BBC segir frá.

Enn geta umdeild atkvæði í Florida skipt sköpum

Þetta árið voru forkosningar haldnar í Florida og Michigan svo snemma á árinu að það braut ákvæði flokkanna. Repúblikanar viðurkenna helming kjörmanna frá hvoru ríki en demókratar engan.

Nú er barist fyrir því að kjörmenn þessara ríkja verði engu að síður viðurkenndir hjá demókrötum. Það myndi gefa Clinton aftur forskot á Obama, því hún vann kosningarnar í Florida með 50% móti 33% og síðan vann hún alla kjörmenn í Michigan, eða því sem næst.

Þetta eru engin smáríki, því Florida átti að tilnefna 210 bundna kjörmenn (pledged delegates) og 28 óbundna (superdelegates) á þingið í Denver, meðan Michigan átti að tilnefna 156 bundna kjörmenn og 25 óbundna.

Þar sem ríkin brutu reglur um að halda forkosningar of snemma er mögulegt að þau endurtaki forkosningarnar. Það myndi kosta tuga milljóna dollara. 

Baráttan er hvergi nærri búin.

New York Times sagði frá. 

Vinsældir vinnu þinnar

Hvernig þætti þér að búa við það að vinnan þín færi eftir vinsældalista?

Margir fulltrúar á Alþingi sjá hlutverk sitt þannig að þeir eigi að setja lög, bein eða óbein, til að hlaða undir eða koma í veg fyrir atvinnu sem þeim líkar vel eða illa, allt eftir atvikum.

Hér á ég ekki við neina glæpsamlega starfsemi. Nei, hér á ég við að það eigi að skipta máli hvort sett sé upp gagnaver, álver, fiskiver eða annað ver við Stakksfjörð. Þá skiptir öllu máli hvar á vinsældalista það er, það ver, svo að þingmenn fari ekki að finna leiðir til að koma í veg fyrir að það verði til. Þá er hægt að nota þessa reglu alls staðar á landinu, ekki bara á Suðurnesjum, og um hvaða atvinnu sem er.

Nú er atvinnufrelsi í landinu. Ný vinnutækifæri sem verða til hljóta að njóta verndar 75. grein stjórnarskrár eins og þau sem fyrir eru.  Atvinnustarfsemi innan ramma laganna getur ekki farið eftir vinsældavali á Alþingi hverju sinni. Það er ekki eins og mannfólkið í landinu eigi að þurfa að keppa eftir viðurkenningu þingmanna á starfi sínu. Löggjafinn er ekki dómnefnd í neinni fegurðarsamkeppni atvinnugreina.