Best að búa á Íslandi, en hvar á landinu?

Nú er ég forvitinn. Samkvæmt Sameinuðu þjóðunum er Ísland hæst á lista yfir lífsgæði þetta árið. En hvar á landinu skyldu lífsgæðin vera mest?

Það kann að velta á því hvort spurt er eftir mælikvörðum SÞ (ævilíkur, menntunarstig og framleiðsla á haus) sem leiðir okkur líklega á Nesið eða í Garðabæinn, eða hvort við leyfum okkur að leggja áherslu á aðra þætti.

Er betra að hafa greiðan aðgang að Kaffitári eða geta gengið um Grábrókarhraun? Ég veit ekki betur en að hver sveit sem ég hef komið í á Íslandi sé sú fegursta á landinu að mati heimamanna, og ég hef komið í þær flestar.

Skiptir það máli að hafa barnaskara í kringum sig? Margir staðir á landinu virðast miklir sælustaðir, en svo tekur maður eftir að það vantar unga fólkið, og þar með börnin.

Svo er rétt að taka fram að ég hef búið bæði á Nesinu og í Norðurárdalnum, í Hlíðunum, á Höfn og í Hornbjargsvita, Kvosinni og Kópavogi og þess utan unnið um allt land.

Ég ætla að sjá hvað fólki finnst með því að gera könnun á málinu, sjá efst til hægri á síðunni. 

Athugasemdir

[Elías Halldór Ágústsson, 28.11.2007 kl. 00:22]

Ég myndi segja í Kvosinni.

[Sveinn Ólafsson, 29.11.2007 kl. 00:10]

Er Kvosin ekki svolítið ofmetin? Ég bjó um tveggja ára skeið við Kirkjutorg, í 150 ára gömlu húsi bak við Dómkirkjuna. Af einhverjum ástæðum hélt úthverfaliðið að miðbærinn væri ælu- og mígildispollur fyrir þau að nota um helgar. Húsið var eins og gatasigti. Þegar maður opnaði skáp í eldhúsinu streymdi vindurinn þar í gegn. Það er búið að gera það upp núna og orðið allt annað.

En það er stutt á alla staði og þetta er eina þorpið á Íslandi þar sem hlutir gerast stöðugt. Svo er stutt að koma sér út úr borgardyninum, svona 20 mínútna akstur eða svipað með báti, klukkutími með strætó eða tveir á hjólinu.